وكالة يقولون

زائر

أطرح بين إيدكم موضوع جداً مُهم في هالوقت
وبكل وقت ، موضوع ينتشر بالديرة أسرع من إنتشار السُحب في السماء الصافية ، أهو موضوع
عن " وكالة يقولون " طبعاً هالوكالة مؤيديها كُثر جداً ، همهم ينقلون الكلام ويقولون ألي سمعوه
سواءً الكلام حقيقي أو من وحي الخيال مايهمهم ، بس يبون يتكلمون ، وكـ عادتي بالمواضيع راح
أطرح بعض الأمثلة وإن شالله الموضوع يتخلص فيهم والكل يفهم مُحتوى الموضوع / :-

1- يوم من الأيام خالد الله يهداه قاعد وذم بـ فلان المسكين وماخلا كلمه ماقال عنه ! " هذا حرامي ،
هذا أبوه بايق فلوس ، هذا مغازلجي ، هذا وهذا وهذا " ولمن نسأله ياخالد من وين هالمعلومات ؟
يرد ويقول :- " والله أمس بالديوانية الشباب يقوولون " .. طعن بالإنسان ووصفه بأبشع الألفاظ
تحت بند " وكالة يقولون " !

2- منيرة عندها رفيجة لسانها يلوط أذانها وماتخلي أحد بحاله المهم قاعده أم لسان تقول :- " تخيلوا
أمس دكتور عادل عقب المحاضرة راح يغازل بنية ؟ " ولمن منيرة قالت حق أم لسان من وين هالمعلومة
ترد وتقول :- " والله أمس حصة قالت لي بالتليفون وتقول إن قالوا لها والناس ألي قالوا لها بعد قالوا لهم
هالشي " ، تـم طعن الشرف وتدمير السُمعة تحت بند " وكالة يقولون " !

3- قاعدين شباب بالقهوة يتهمون واحد من أعضاء مجلس الأمة والمشهورين بأخلاقهم الحميدة بأنه
حرامي ويوظف عايلته ويبوق فلوس من الدولة وهو أبو الواسطة ، ومسرع الكلام هذا ينتشر لمن
يوصل أخطر وكالة نشر بالعالم ألا وهو " المنتديات " وأعضاء المُنتديات الأخيار لمن يسالون عن
المصدر يطلع صاحب المصدر يقول :- " والله سمعتهم يقولون " ، إتهام إنسان بأنه حرامي وخاين
للأمانه ، وكل هذا تحت بند " وكالة يقولون " !

أنا خلصت موضوعي وماقول غير ، حسبي الله عليها من وكالة

وكالة يقولون 7174

الله يهدي الجميع يعطيك العافية

مشكور لموضعك اخي مشكور

اممممم

الله واعلم هاذي الوكاله مدري هالقناه يحبوونها البناااااات ((((((يا ساتر شكله بينضرب

امممم

يصلموو على الطرح يا عثل وربيه موضووعك شييي

ننتظر جديد